YUA KPE KI GUA KI FI YA SIEDI N°3


Lanin ya siedi tie o bontaalo yaala n tie caga luoba yuli nni. Ki bandi mi bangimi ñuadu, gadi ki cili o bonyendo ki ban gbeni o bonluobilo kuli.


Li den paki ti ke ti ye leni mi gangima. Ti bani lan bua ki yedi yaala, ki diegu tugun tiadu kuli den ye li kani, ama i pasiteri leni o pua bebe n den bodi. Lanwani ti den tieni i ñakaadi ki baa yini sutaani leni Jakelini. Jakelini den paagi ti pala. O den yedi ke tin moandi ki bia ki yaa yi lisiferi, o den bia ki yedi ti mo ke paalu ba kuli li ŋandunli nne ki fu ki bisi tipo. Ama bonliba den ti yedi nni n pali nni ke min ñia ki yaa sie niini. N lieba kuli den bia ki ye U Tienu nilo yeni deeni nni. Bi den bia ki yi lisiferi, gadi mi yema nilo yeni n guadi ki doagidi. O den joani tanpoli. Li ya yenma nilo den tie ya maleki n gu i pasiteri yeni. Wan den tandi o nuu ki cubini n lieba, n den gbadi ke li te nani li bonpudikaala n pudi. U Tienu maleki den ju n lieba yaaba n bia ki ye ki diegu nni yeni.


Min den gbadi ke li pudi yeni, n den sua ke n lieba nibilie kpe buoyenli. N lielo o yendi o mo li den juo boncianla ama waa kpe, o nitaalo, omo taali den jobidi. Mini bebe n den bia ke li ba kuli ki tieni nni. Lan ya tie ti tuonkpiali. Tin den guadi Pandemoniyomi diema nni, n den yedi Jakelini :" Mii di bua ki guadi ki gedi tuonli bapo ki tinga nni kelima li pia yibilisi boncianla. N bua ki yaa nua n pua leni n bila." Ama o den paagi n pali ki puni nni cegilu. Li ya puoli, n pua yua mo bi tie mi ñima nni pua den yedi ke min suagi liiga leni li koanli leni JESU yaaba kelima li pia i pani boncianla.


N bua kaaba, o nisaalo tie yantiali ya. O pia naanu ke o ye o gbannandi tugu nni. Ŋali ya yogunu ke ti gua, ti gbannandi bebe n gua, ama o naanu wani ki gua a bada. Ŋali o naanu ban la yaala yeni, ti baa sua ke ti nua la ti dangidi nni. Ki ñuagu tie ya yogunu ke li bigili nni tuona yabi boncianla, ama Li Miali Diedo guuti. Yogunu kuli li pia Li Miali Diedo maleki ñuagu kuli ke o guuti. U Tienu tili masi : "Yaa jaanti mani yogunu kuli ke yin ba o paalu ki fidi ki cia lanin ya bonla." Li ya puoli, Jakelini den soani nni tinga nne ke min coa ki ti teni ñinbiagu n bia ki baagu nni. Nibi boncianla den ye li ñinbiagu nni. Nani min den pia mi boanma nni paalu yeni, n den coni ki biagu yeni leni n nuu ki dadi o puoli. O biagobidito den gudi la baa ŋmagidi o, ke o bia mi ñima nni ke niba boncianla kpe.


Ti tuonlieli den tie ki ti kpa pua yua n jaanti. Tin den moani taalimi yaka, ti den ti ta jagili ki baa teni wan foagidi o pali leni U Tienu. Tin den ta ya sanbili den te ke ti teni ke o buga ya ta tentebiadima ŋali maama ke li pogili o pua yeni ke o baa ti luo ti dugudu U Tienu po. N den waani yi ti bangima nni, ke bi den bangi ti tin baa te maama ki kua o nisaalo nni, ki yaa tuuni leni o. Ti lielo yendo den ta jagili ki baa kua o jawaalo yeni niinni ki soani leni o. Ti lielo yeni den koani o jawaali yeni nibili nni, ki kali o niinni, ki teni ke o cili ki su, ki pia a koankoana, ki tiedi ke o na ye leni yepaama.


Lan cili ya yogunu, o pua yeni ki den bua ki tuo ban wangi o ke o bijoa yeni tie maama. Ama lan suagi liiga, o jawaalo yeni tentema den ti daadi, ke o pua yeni pali den bisi o buga yeni nibiadima po. Yaala bia te ke o pua yeni ki moani ki baa tieni mi paadima. Ki buga yeni bi tie yua n dingi boncianla, ama o pua yeni ki bandi ki baa tieni mi paadima, ki bandi ke o buga yeni n lebidi maama yenmi yeni tie ke a cicibiada ya koani o kani. Li bua ki yedi ke o pua yeni bi baa bandi o buga yeni lebidima, ki koani leni bali leni ya cicibiadiga n ye o buga yeni kani. U Tienu tili yedi : Luka 10 :"19 N puni yi u paalu ke yi baa fidi ki ya ŋmaadi i we leni i nami, ki ya paani yibali paaciamu kuli. Liba kuli kan fidi ki tieni yi yaala n bia."


Ama o pua yeni den moani mi nisaalima nni, ki fiini o pali. O den cili ki wangi o buga fala. Nani ki buga yeni n kaa lebidi yeni, o den ti foagidi leni U Tienu. Li tie lan ya yogunu ya ke ti fidi ki coni o naanu ki gedini o li biigili diema nni. O den bia ki fuo tinga nne, ama li dandanlin wan po o kpe. Ti den jagi ki waani wan baa kpe ya kuuma. Yogunu ba n pendi, o den kpe. Li pia yaaba boncianla ke bi kpe ki bi gbannandi nan bia ki cuona. Li tie gadi i jaanti bebe ya fu ki labidi bi kuuma. O pua yeni kuuma puoli, bi den pani ti boncianla:a lola, ligi leni bontoala.


Dayenli Jakelini den ti teni ti ki buatigu ke o pia bi nisaaliba soama ke li pia sida bonfuodiga. O den teni ti i piemi, ke ti den baa gedi ki tinga nni, bi niba n yabi naan kani ki ban muba. Ŋali ti ban mu yuan, o baa gbadi ke li tie nani juumo ya juni o, ama laa tie yeni. Niba boncianla ye ki pia yianbiadi ke li ŋoadi leni mi boanma nni yaaba. Li tie gadi leni i jaanti JESU yeli nni ke li kuli baa paadi.


Li ya puoli bi den di cuani ti tinga nne ke tin ti soani. Bi den soani nni jaandieli nni ke min ban bolini li. Nani min den baa soani lan ya tuonli leni n gbannandu yeni, n den gedi ki tinga nni leni n gbannandu, ki ban koani li jaandieli nni. N den ban ta o piapiado nannanli. Mamiwata yeni den teni nni i ligi boncianla, kelima o bani ke dinla U Tienu tuonsoanba, ban fu ba naan kani tie i ligi nni. Leni i ligi, a fu ki da U Tienu nilo yantiali. Nani min den tie yuan todi li jaandieli ki cie yeni, i pasiteri yeni den ti ta nni ki teni ke n tua li jaandieli nikpelo, niba boncianla den kpe li jaadieli nni yeni keli ŋoadi leni mini. Lisiferi tuonsoanba tie bi nisaaliba gbaami yogunu kuli sutaani po, ke li ya niba naani yen ti tua sutaani tuonsoanba o diema nni. Tianba tuuni nani a cicibiada. Bi baa soani ba ban ti koani leni a jaandiena leni bi niba li ŋandunli nni.


Ŋali ya yogunu ke ti fidi ki ku JESU yua, bi yen paati i pani boncianla. Ama kaani boncianla, ti yen ti ban kpe kelima ti tuogi leni JESU yua. Mini n baceli, mii kpia ki tieni o ñanianu leni sutaani. Min wani te ke bi tieni nni o gbaamu, ke lani n teni ke bi kuani nni sutaani toagoli nni nani yaaba n sieni ke bi kuuba leni ti suadi. Ama min de tuogi leni JESU yaaba, n den bandi ke bi ya kani koanli pia yibilisi boncianla, keli ŋoadi leni bi dandana paalu. Li den kalini tuonli tinga nne, ke cicibiada cagilicua ki kaa fidi. Bi den mia ti tin cua ki ti ga bi buoli.


N den tiadi ke bi den gedini ti ke tin ban bolini JESU yaaba dayeli yaaba n daani ke laa wagisi. Tin den jiidi ki ñuagu li ya dayeli nni, ti den sua ke bi nibi kuli guani. Tin den sie ki bogindi tin baa tieni maama ki bolini li dayeli yeni, bonludi kaala den tieni. Nungbangu kamima, li dayeli yeni den kpandi baciangu ke mi ñima tiini leni paalu ki ca ki kua ñincianma nni. N kpiiba, li ya dayeli den kpandi baagu ke ñima ca ki kua baciantagu nni. Lan ya bonla siiga, ŋali a kaa bani ki dugi, a baa kpe. Ti coali n den yabi yeni, tianba den kpe ki baagu ñima nni.


N pagi U Tienu yeli kelima n bi kpaani i jami, n bani ki dugi. Nii la tin bi laadi yaala buolu ŋali ti yen tuogiti leni JESU yaaba. Tin den guadi mi ñima tingi po, Jakelini den lingi sanbitoali. O den yedi ti :"Yi kan tuogi li dayeli yeni yenma, ama yi baa tuogiti niyendi yendo." Ti den gandi o nikpialo. Jakelini den yedi ti ke lanin ya koanli yeni ya ke bi yi ki kpe yenma. Ti den baa pua tin bua yuan yeni yuli leni o gbiemu. Jakelini den waani o nuu ke ti la li ya daano ke o cuoni o sanu nni. Ti den jiidi tonma o sanu ni ki ŋua li daano, ama waa fu ki laa ti kelima ti yindi, ama mi yenma nilo den daadi o puoli. O den piigi ti sanu. O den sie tinba leni o nilo yeni siiga. Tin den sedi ya yogunu, o den bodi. Ama ti yaa guaki ki cuoni ki mua yaala n baa pundi o nilo yeni, o di yen daadi. Ŋali ti yen sedi, o yen bodi, ama ŋali ti cuoni, o di yen daadi ki pigini ti sanu. Ti yaa sedi, wan bodi.


Yogunu ba, ti den sua ke mi yenma nilo yua n tie o maleki guudi koa yeni ki di daaditi. Lanwani ti den yedi ke ti baa gbeni o maama tontoni, ama ti jawaantu den ye ti siiga ba ke waa di daadi ti, ke li ya nilo yeni cuoni nani yua kaa pia guudikoa. N kpiiba, mini yapo, li ya yenma nilo doagidima bua ki waani ti ke bonli baa tieni. Lanwani n yen tie ŋania. N yantiali nni n den gbadi ke bonbiadila bua ki tieni. Lanwani n den suli. N lieba den ye liiga, n lielo den ta jagili ki baa pua o. Ti den jaanti opo. Wan den ŋagini o nilo yeni ya yogunu, ki yugidi o nuu ki bua ki pua o leni o gbiemu yeni, lani n tie si n ñani tanpoli ki jobidi o nuu yeni. Lanwani ti den sani yua kuli o kaanu.


U Tienu tili yedi Miñama 28 :"7 I dopandi yeni baa tuuni a ñoagibila ya ye li padibinbinli kali po yene lan todi li tugima po." Jakelini den nua tin tiedi yaala kuli leni tin gudi maama. Tin den guadi ki gedi ki baa ban togisi o yaala n tieni, n pali den beni ke n sugisi o. "Ninba wan soangiti lanin ya koanli nni ki bua ki kpaati ya ?"N lieba den mia nni min cedi min tiendi yaala yeni ki nan mua. Bi den yedi :" Ŋali a tiedi yeni, o baa ti kpa ti kuli."Ama n den bia ki sugisi o kelima n bani ke n baa kpe. O niba den cua ki baa la yaala n tiendi. Li yogunu Jakelini pali den fi, ke o fi o siesi nni ŋali ke o gbanu jegili. O pali n den fi, n den la ke o yudu jiidi ŋali o taana tingi po, ki kpandi wua, ke o nuni cuoni. O yudu kuli den kpandi wue. N den bani ke n kan ba ki yaa fuo li ya yogunu.


A cicibiada naani nani bi nisaalibi yeni. Li tie ke ŋali bi pala fi ya yogunu ya ke bi yen kpandi bonyuodu. Lan ya bonla n tieni ki pendi, n kan di fidi ki soani opo. O den baa ta n po jagili. N kpibuadiba, yua n tieni u ñanianu leni sutaani, ba ke o ŋua ban bili opo maama, li juodima sutaani baa kpa o ke U Tienu n bili opo ya bina daa gbeni ki ba ki kuani o o toagoli nni, wan yaa tuuni nani cicibiadiga.


N tiadi ke pua den kali ki tie suano. O coalo den deli o kelima ti suadu yeni po. Lanwani o den ta jagili ki baa bolini o jakpelo den yaaba. Ya cicibiada ya cagili n kpia ki gedi yeni den gudi kelima li ya joa den tie JESU ŋoadikoa, li biigili diema nni bonla ki fu ki la o. Ama tin den cua ki baa goandi yeni, ti den fudi ki la li ya joa leni ti masina. Li bua ki yedi ke li ya joa dandanli den wadi, o den pia tayenli tugu nni tayenli mo niini. Ki baa ki kpa lan ya joa, n lielo yendo den yedi o baa kua o joa yeni nii nni kelima ti den pia li banma. Ki baa ki kua nisaalo nii nni, ti yen teni ke li daano yantiali kan yaa ye kaanyendu, nani jiwaantu, bi li pakili. Wan den koani o joa yeni nii nni ya yogunu, o den teni ke o tentema lebidi. Ya yogunu ke a cicibiada ye o nilo nii nii ki die o, li daano yen lebidi yenma, o kan tiadi ke bi tuuni leni o yantiali. Li ya joa den ti ban soadi oba kelima o nia leni wan guadi ki ta ya pua. Li tie gadi ya yogunu ke o mua yaala n baa kpe yeni, ke n lielo yeni ñani o nii nni ke o bandi wan tieni yaala, ama yogunu ki di ye opo. Ŋali cicibiadiga ye o nilo nii nni, li tie gadi ya yogunu ke yaala n bia baa cua yeni ke o baa bandi ke laa ŋani.


Jankpaanto ti ban ye mi ñima tinga ŋandunli nni


Jakelini n pendi naan kan kuli, mi ñima ya ŋandunli nni, a tuona yen sedi kelima a ta sutaani gufeneri nni. Dayenli ke ti den pendi yaala n tie mi ñima nni tinbuoyenli nni, ti den sua ke a fula ye boncianla. Bi niba ki den bani ke Jakelini cua o dogu nni. Wan den pundi li kani, bi den waani o ke jankpaanto den jiidi yaala n tie mi ñima tinga ki kaa pia li sanu. Li ya jankpaanto den mia mi ñima nni ki baa ñani o taali, gadi wan ban koani li ya diema nni. Waa den fu ki bandi wan ye naan kani. O den tie bonbima, ke li paki o. Bi niba den miabi o. Bi den yini o : "Tii fu ki yaa ye leni mi yanduanma kelima ban kpaani i jami leni i taali yeni."


Jakelini n den baa ki pundi, o den sua ke o jankpaato yeni ti jawantu den pia o ke o jegili, leni o dogu yeni n ŋani maama. O den yedi o :" Joa ne, n kan kpa ŋa, ama a kan ban kuagi ti diema ne maama yi ŋandunli nni." Ban den mua la baa guani o joa yeni ki tinga nni, mamiwata yeni den yini o ki yedi o :"N la ke a kan ban ŋmini." Lanwani o den piebi o ke o tua muku, ke bi den guani o niini. Cedi min waani yi bonla. Yin nua ke i kpakaabi yugisi maama yeni, li tie man ko ya ke yaaba n ye mi ñima tinga yeni mo nua yaala n cuoni mi ñima nni kuli. Boncianla yaala n fuo mi ñima tinga yeni den tie sutaani yaaba. Sutaani den kuba ke bi yogunu daa gbeni. Bi kpe ki nan guadi ki ban cili bi fuoma mi ñima ya ŋandunli nni. Li ya niba naani yen ye sutaani toagoli nni ki nan gu ŋali U Tienu n bili bipo ya yogunu n gbeni.


Mamiwata jakelini


Lan ya pua tie lisiferi puoba siiga nni yendo. O yen yedi mo ke wan tie bi niba kuli pua kelima o tie poconconbiadi. Sutaani tuonsoanba boncianla ta lan ya pua, ama li nan tie tilasi ban yaa gubi lipo ya potaali ŋasiili. O yen ta wan bua ya nannanli ki teni ban la o. O yen fu ki cua ki tinga nni leni o gbannandi, ama o ba kuli kan bandiwan tie yua n. O tagi ki nagidu tiadi boncianla ki lidi bi puoba yama. Bi yi Jakelini mo "bina tusili." O tie yuan ya ye i kaani kuli nni, kelima o ya foti ye a diena kuli tugudu nni. Ŋali suano yua n cua a deni, o da yen kpia ki gedi lan ya foto kani kelima wani n pia i laabaali, i kaani kuli tinga nne. O suano yeni baa gedi ki ban mia o ki ba i laabaali a ya yuli nni.


Bi nisaaliba gbaami


N bua ki waani yi ke li pia nisaaliba gbaami bonbi lie. O gbankpialu tie ke cicibiada ñu mi soama. Ŋali bi ñuni mi soama yeni, bi yen ta ti gbannandi ki gedi nni i masina diedu nni Pandemoniyomi diema nni ban ban tagila bonla. O bonlielo tie ke ban baa gbaani yuan yeni baa tua yonbo li bigili nni ke bi yi bani ti yandi. N den tie yanga lan ya diema nni, n bi tie yonbo, ki tie sutaani nilo n die yuan. Yaaba n den die nni den fu ki ta nni ki kuasi ban bua yuan po. Li pia sutaani tuonsoanba leni cicibiada yaaba n da ki go kuasa ya niba ke bi gbaani ya naani. Bi yen kuasi i naani ban yi yaaba ti yandi yeni, ama ŋali li ya yanga ban kpe, bi yen ta o ki gedi nni Pandemoniyomi diema nni mi jietienma masina nni, ban ban tagiba jiemi ba.


Ŋali bi tagila ki gbeni, bi yen tieni la i buata nni ki cuani la ki tinga nni. Dinne li pia JESU yaaba baani n kaa jaanti ki nan di, ba ke U Tienu tili masi : Efesa 6 : "18 Mi Fuoma n teni yin ya jaandi yogunu kuli, ki ya miadi U Tienu yogunu kuli leni i jaandi leni bu miabu buoli kuli. Ya miadi mani U Tienu o nigagidiŋanba kuli po ki da yoaligi ki da cedi." Tin daa sundi ke tin di ya jiema dinla, boncianla ñia lisiferi diema nni. Sutaani diema pia bi niba boncianla yaaba n tie ti yandi ke tianba mo tuni nani cicibiada. Bi tiendi akisidanba leni i yiani boncianla tinga nne. U Tienu tili masi ke ŋali doagidima kaaye, bi niba yen cuoni ki kaa sie. N den la ke pasiteri yendo puolipo yogunu ne ke o kuani yua pua ti baantiadu niyendo ke waa tie jajaanto ki yedi ke o tie U Tienu tuonsoanlo. Mii den fidi ki baa noandi lan ya bonla kelima li daano ta sutaani gufeneri nni. Wani n tie ti diema nni o nilielo yua n ta sutaani gufeneri nni. Li ya nilo fu ki gbaani nilo kuli, wan tie ya nibuolu kuli leni wan ñani ya diema kuli.


O jawaalo yua n tie ki kpebiga laabaalu


N tiadi dayenli mamiwata yeni den teni ke tin cua tinga nne ki ti cuo jawaalo. O den tie kpebuga. O danba n bi fuo ya yogunu, bi tieni o ñanianu leni li biigili ŋandunli ki bua ki ba mi yugidima leni mi piama. O ñanianu yeni nni, li bi tie ke li ya jawaalo n baa ma ya bila kuli pia ban baa kpe ya bina bianu. O den ba mi piama, o bila mo den ku ki ŋoadi leni ban bili maama o ñanianu nni Pandemoniyomi diema nni. Ama ban den ban kpeligi, bi den sua ke bi pia mi piama ama baa pia buga. Baa den pia buga. Bi den la lan ke lan ya yema bia bipo, ke bi baa ti kpe ki kaa pia buga, ki kan ti ba fajielo yua n baa ti ga bi piama bi kuuma puoli.


Lan ya po, bi den ta jagili ki baa yie o ñanianu yeni maama, ki mon ba buga. Bi den taani ke bi kan kpa bikan wani nani ban bi ku a bila ya kpabiadima yeni. Yogunu ba bi den ba bonjaga. Li ya bojaga n den fandi, ki pundi ya binli ke o baa kpe ki ŋoadi leni ban bili maama bi ñanianu nni, ki buga danba den yie la baa tieni ban bi baa tieni maama a cicibiada yeni n den miaba ki buga yeni. Li den pia ban bi baa tieni ya bogida ki buga yeni naanu n ñia.


Bi den bi baa tieni gbaami maama ke ki buga yeni baa yiagi ki kpe ke nilo kuli kan tama ke li ŋua bani. Ki buga danba yeni den waani a cicibiada yeni, leni Pandemoniyomi diema yaaba ke bi kan padi ki buga yeni. Ki tinga tingi po yaaba den waaniba ke bi baa kpe ŋali bi yaa gbaani ki buga yeni nani lan bili maama. Ba leni ban waani ba ya maama kuli, bi den tuo ki kpe kelima bi noandi ki sua ke bi kpeliga ki tuo ki kpe bi buga buoli. Lanwani ki buga mo baa fidi ki ta mi piama.


Ban den yie la baa tieni o ñanianu yeni n bili maama yeni, yogunuwaamu ki buga na den kpe. Ya yogunu n ŋua o piinma puoli, o canba mo den kpe. Li kuli tie ke bi buga n fidi ki ta li faali. Ama bi kuuma puoli, li dayeli nni yaaba den ga ban ŋa ki buga po ya piama yeni leni paalu, ki yedi ke wani n teni ke o danba kpe. Baa den fu ki bandi ke ki bonjagi yeni danba tuo mi kuuma ki bua bi buga n ta mi piama. Li ya puoli pendima, bi den deli ki buga yeni ki ñani o deeni nni. O den kpandi ya nilo n kaa pia kaanu.


U Tienu n seligi yi





Tweet
Yi pia u sanu ki dadi li ya tila ki boagidi ha.
Ki bak i kuani lanin ya tila, yin ñi naan kani ke li diani PDF yeni.
PDF

Ki bak i yaa cogi a tila, yi baa yaa pia Acrobat Reader.
Hali yi kaa da pia o, yi fu kuani fanma
 :