YUA KPE KI GUA KI FI YA SIEDI N°4


Lanin ya siedi tie o bonnaalo yaala n tie caga luoba yuli nni. Ki bandi mi bangimi ñuadu, gadi ki cili o bonyendo ki ban gbeni o bonluobilo kuli.


Ama lan ya dayeli nni yaaba n den ga mi piami yeni kuli, bonla den tieni. Bandi mani ke li ya buga na leni o canba n kpe yeni bi den gedi nni ba sutaani diema nni ti yonbidi kaanu ke ban yaa ban tuni ki nan gu U Tienu n bili bipo ya bina gbenma. Li tie lan ya puoli ya ke bi baa fidi ki gedi bi tankpiiba diema nni. Bi den gedini ba mi ñima tinga ke ban yaa ban tuni a tuona. Ban ban ye li ya diema nni ya yogunu, bi den la li dayeli nni yaaba n ga ki buga yeni piama maama. Li tie moamoani, ki buga yeni danba n den kpe, bi den li ban tie yonbi leni cicibiada moamoani ya ki tuuni sutaani diema nni. Nani ban den pia nisaali yantiana ki nan ye sutaani diema nni yeni, ban den la ke bi ga ki buga yeni piama ki ŋa o ke o yali nni, bi den cili ki pua ki diegu nni yaaba yaaba n kuani bi tuobu ki buga yeni piama gaama nni. Lan mali yaala tie ke niba boncianla den kpe ki diegu nni.


Bi niba yaaba n tiendi o ñanianu leni sutaani diema yeni kuli ku tontoni kelima o yen bua ki kuani ba o toadoli nni. Bi yen tuuni ki tingi tingi po ki tie a cicibiada ki tinga nni leni bi tankpiiba diema nni ki gu U Tienu n bili bipo ya bina gbenma.


Ban den deli ki buga ki ñani deeni nni yeni, U Tienu tuondi, jaandieli yaaba den la ki buga yeni yema n tie maama, ki todi o. U Tienu niba den ga ki buga yeni cangu ki todi o. Bi den ba opo duanu ki gedini o cogidieli nni. Lan ya yogunu o danba den ban tuni a tuonpaala bi tankpiiba diema nni. Dayenli li ya niba bi den ti yini ba taanli Pandemoniyomi diema nni. Ban den pundi, ki liiga yaaba den yedi ba :"Li tie moani ke ti teni ke yi yema li ŋandunli nni poadi kelima yii tuo o ñanianu tin tieni yuun. Yi den yie u ñanianu lani n teni ke yi fuoma gbeni ki tinga nni. Tii bibua ninba wani nieni, ama ti bi bua yi bila kelima tin tieni ya ñanianu yeni po yin baa ma ya bila tie tinba ya yaaba. Nani yin bi tieni o ñanianu ke ti baa ga yi bila kuli yeni, li tie tilasi tin ga yi buga yua n ye tingan yeni mo."


N buakaaba, li ya niba den moani yaala n baa mia ba sugili ki koani ki ga bi buga, ki waani ba ke bi tuo ki kpe ki buga yeni buoli, ama ki liiga yaaba den yie kelima o ñanianu yeni ki fidi, ke ki buga yeni baa li kpe ya ki cua bi kani ki tintinga nni. Sutaani diema yaaba den ta nisaaliba yantiana ki buadi ki kpa ki buga yeni, ama baa fidi kelima ki buga yeni den ye U Tienu niba ya nii nni. Ban den gudi yeni, li de te tilasi tin ga li koanli yeni. Mamiwata den tieni ki buga yeni tele ke ti la ke niyendo n gu ki buga.


Ti den ta o yogunu waamu ki bua ki ba i laabaali ki buga yeni po. Ti den nua ki buga yeni yema tele nni, ti den bua ki le tin baa tieni maama lan cuoni tipo. Ti den bani ke o tie kpebuga kelima o danba ye ti ya kani bi tankpiiba diema nni. Ti den fudi ki la ba ke o ye jaandieli nni, o yema nan bia ki yia kelima o bia ki tagisi o danba po. Lanwani ti den cua ki tinga nni ki baa la o. Ti den coa leni ti gbannandi ki tinga nni, ban ye naan kani ya ŋaginma. Ti den jiini lo paana ta kelima ti den ta bi ligi danba ya nannanli. Tin den ci, ti den ban cuubi ki buga yeni kani ke o ye ke li baa tie nani meta kobi lie(200). Tin den la o, ti de puosi o, ki buali o danba maama. O den mua ki nan yuandi ki yedi ti :"Yin lingi ya niba yeni tie n danba, ama bi nan kpe ŋo ya." Ti den yedi o :"Ti tie a canba danlinba, ti ñani Eropi diema nni. Ti cua ki bua ki la o kelima wani n bi todi ti ke ti gedi lipo."


Ti buoli puoli, ti den puni o i ligi boncianla, ki nan mia o wan daa ti ye jaandieli nni, ama wan ban lingi diegu ki yaa ye li kani. Wan den ga, waa den waani U Tienu niba yaaba n guu o yeni, o den sani ki koani o dogu tugu nni ki baan lingi diegu. Ki ba ki kpa lan ya buga ti den ta ya sanbili den tie ki teni wan foagidi leni U Tieni niba leni li jaandieli. Li kuli ki daa gbali nani yaaba n kpia yeni. N bua ki waani yi ke tin den boni leni ki buga yeni ya yogunu, ti den tieni li bonpiginkaala ke ya nilo n ŋua tin ye naan kani kuli, o yaa ban pundi li bonpiginkaala yeni kaanu, o baa guadi ki ta santo. Li kuli tie ki fidi ki boni leni ki buga yeni ke nilo kan pogili tipo.


Ti buoli puoli, ti den teni ki buga yeni i ligi boncianla, ki den guadi ki tinga tingi po. Ki buga yen den cili ki fuo mi yemanma nni, ki foagidi leni li jaandilei leni U Tienu niba, kelima ti den puni o i ligi boncianla. Ti den cili ki teni ke o foagidi leni li jaandieli leni U Tienu niba. N bani ke yi fu ki buali lan ya lola n ñani naan kani. N bua ki waani yi ke mii bi lia ŋanbu mo, n ko bi ye leni n kpata jenjenboanga, ama n den kpandi. Tin den gubi ya lola mo den tie janboata kuoma ban luni yaaba. Ti den yedi ba ban kpandi lola. O nisaalo nuni po, bi den tie lola ama li den tie bontoala.


Nieni ti den tiendi i kaanmudi lebidima. Bi nisaaliba nuni den nua lan ya boata nani lola ke li ŋoadi leni mi lebidima. Lola boncianla o sanu nni tie kukpagidu, leni kpaba, ama mi lebidima teni ke bi nua ba ke bi tie lola. Bi tankpiiba diema nni li bonli cuoni leni mi ñamaama. Ti yen ñani li ñabonli, li bonla n tieni. Li ya daali n de waani min bua ki yaa lia maama. N den ñani ñanianu ke n bua a boata yeni n kpandi lola. Ŋali U Tienu bi ŋubidi o bila nuni, bi bi baa la nni ke n sie leni kpata jenli, ki tie bonkpabili, ki la boata ban sani ki dini yaaba ya jiema.


Tin ye ya ŋandunli nne tie nannanli bebe. Bi nisaaliba nuni ki nua li bonli kuli nani lan tie maama. N den waani yi ke n den bandi oridinateri bi tankpiiba diema nni. Cedi min waani yi ke yua n bani ordinateri ŋandunli nne ki cie tie lisiferi. Wani n tie li bonli kuli cilima ya yua. Yogunu kuli li ya maleki yie koa yen tagisi wan baa tieni maama ki fidi ki teni bi niba n yaa laadi li boncanla yaala n tie oridinateri, telefoninba. Lisiferi den teni leni o ñabu maama bebe ke ban yi ya loli limoyinirene yeni tieni. O den tagisi wan bua li loli yeni n yaa tie maama ki ko masi mi maama ke li ko li tieni naniwan yedi maama. Mi ñima tinga, ti diedu mo ko li ma leni mi maama bebe.


A babandiciama yen cua li po ki ti bangi, ki guadi ki gedi ki tinga nni ki ban tieni nani ban bangi maama. Bi yen ta bi yogunu ki bangi yaala n ye mi boanma nni diema ki guadi ki cua ki ti tieni nani ban la ke li tie maama. Mi ñima nni diema, sutaani gu ya niba n pia o paalu. Ama bi nisaaliba yantiana yaaba n ye o kani yaa mua yaala n baa kpe, o yen taaniba, ki teni a cicibiada n tieni i ñakaadi, ki teni ban te lola bi popoba. Li ya popoba leni li lola, bi yen cuani ba tinga nne. Ŋali a da li ya popobili, bi li ya loli, bandi ke ŋali li ya nilo ti kpe, a baa tieni akisidan kelima li ya popobili tie nilo. Ŋali U Tieni bi baa ŋubidi yi nuni yin la ya lola n cuoni ke yi ñuasibi yeni kuli n tie yaala, yi pala bi baa bisi. U Tienu tili masi 1Jan 2 :15 Yin da bua mani ŋanduna leni yaala n ye lienni. Yua n bua ŋanduna, waa pia buama Baa po o pali nni.


Lanwani dayenli ti den toa i wali, ki ti tiadi tin den teni ya buga i ligi, ki bua ki kpa o yeni maama. Ti den noandi ki sua ke o ñu mi daama ki gaadi leni o jifanba. Ban den ñuni ki gbeni bi den ta wan da ya loli leni ti ligi yeni, ki baa kpeni. Lanwani ti den jiidi tinga nne ama ti den cua ki tie cicibiada. Ti den coni li loli yeni ki lengiti. Wan leni bi jafanbi yeni den moani yaala n baa ñia, ama baa fidi. Ti den teni ke bi ban pua goanli ke o kpe.


O piinma yogunu; bi niba den yedi ke o ban lingi o ñoagu ya kelima o den ba i ligi boncianla. Ban den piini o, ti den gedi a kakula nni ki ban fiini o leni mi ñamaama. Li den tua opo bonludikaala leni wanla ya nitaadiba ke bi puni o i ligi ki yedi ke bi tie o canba danlinba yeni. Lan yendi waamu ti den kpandi bonbiadila o nontuali. Ti den yen tua bonla yaala ya ni ŋala n yabi boncianla ke li ñina mo solin. Waa den fu ki bandi lan bonla n bua ki yedi yaala. Ti den ta li ya jawaalo ki gedi nni mi ñima tiga. Tin den pundi, o den la o danba ke bi tuni a tuonfala kelima bi den tie yonbi lipo.


Li kuli den tie opo nani filimi, ke li cie o moano gbadima. Li ya bonjaga, bi den kuani o sutaani toagoli nni, ki baa teni wan lebidi ki tua cicibiadiga ki guadi ki yaa ti tuuni tinga nne. O den baa tuni yeni ki gu U Tienu n bili opo ya bina gbenma. Tin den fudi lan ya tuonli, bi den tieni tipo o badu. U Tienu tili yedi Luka 15 :7 N yedi yi, li pamanli baa ye tanpoli po ki kelima ti tuonbiadi daano yendo yua n biidi o pali o tuonbiadi po ki lebidi o yama, ki cie niteginkaaba piiyia n niba yia yaaba n kaa nua ke mi lebidima yeni tie tiladi yaapo.Cedi min waani yi bonla. Pandemoniyomi diema nni, bi tie o badu ciamu ŋali ti fudi ki ba JESU yua niyendo ki cie tin ba yaaba n kaa jaanta nibi tusili.


Ti yen ma a dayela yaaba n bi mali ki pia o ñanianu leni sutaani diema ke li ŋoadi leni ki maasuagu bonla. Ŋali lan yaa bonla kaa pigidi, ti baa tie sutaani n tuoni yaaba. Tii bani ti bikpelinba n bi tie yaaba. Ti paka boncianla, tianba yen ŋua leni ti bikpeliba n bi piaya bulisi leni ban bi pi aya bogida ki maasuagu nni. Ŋali a bikpelinba bi ca bi tanpuaba leni bi babuuba kani, lanwani gadi a ba mi faabima kelima li ya niba tuuni sutaani po. Bi yen teni tin mo n yaa pia moala mi tugini leni sutaani diema ki kaa faami lipo. Ŋali a ban koani ya jaandieli ke li gobidikoa tuuni leni mi boanma nni paciami, ki nan bi maani apo o nii, gadi a ba mi faabima.


Dayenli n den ye leni n lieba yaaba n tie ki tingi tingi po yaaba. Yendo den kuagi wan ŋa ya dayeli tinga nni ya maama. O den yedi ke wani n kpe ya yogunu, wan ŋa pua ya leni bila ke moala ne wan la ke bi yalina boncianla ke gadi wan tieni bonla ki todiba. Nieni ti kuagi ya niba n kpe ke bi piiniba ke bi nan fu ki guadi ki yaa tuuni tinga nne nani yaaba n kaa kpe yeni. Yaala n tie ki todi o pua leni a bila yeni, o den diani tili ki tieni ligi li tili nni yeni ki ban bili o pua leni a bila yeni n ye ya diegu buliñabu nni.


O pua yeni n den fi ki taansoangu o den la li tili yeni, o den ta ki sua ke tugu nni pia i ligi leni tili. O den ta li tili yeni ki sua ke o coalo yua n kpe yeni n diani opo, ke li den paki o boncianla. O den ta li tili yeni ki cogi ki sua ke o coalo yedi :"N buado, n sua ke fini leni n bila kuli yalinna, li tie lan ya po ya ke n soani apo ya ligi n tie ne ke ŋan ga ki yaa nua n po n bila. Ŋan daa yasi ke mii kpe ye. N pia laafia mo min ye naan po yeni." O pua den yasi ki ta i ligi yeni ki gedi ki ban waani o pasiteri. O den waani o ke wan coalo kpe ke li wagisi, ama o nan soani o po ya tili n tie ne leni ya ligi n tie, ama wan nan yasi ya. Li ya pasiteri den yedi o pua ke i ligi yeni jagini, ama i pasiteri wan den gubi i ligi yeni ki biidi la leni o lieba ke bi dini.


Ti den nua li kuli tin ye naan po. N lielo pali ki den mangi li ya pasiterinba po kelima o pua ki di ba i ligi, ki nan nua ke lan yanluodanba gubi o ligi ki di. Lanwani o den lingiba. O den teni ke bi kuli kpe yaala n tie akisidan nni. N den kali li ya tuonli nni. Yogunu to o den ti soani opo ligi ki diani titoaliki yedi :"N buado, ŋali a yaa bua n ligi, nan cedi n bila wani n yaa di n ligi. Cedi min waani a ke mini n ku li ya pasiterinba kuli kelima bi dini n ligi bi bacieni po."


O pua yeni di ta ligi yin mo ki gedi nni pasiteri toa kani. Wan cogi li tili yeni ki sua ke ya kaanu n masi ke o ku i pasiterinbi yeni, waa den buadi ba ki si iligi mo. O pua yeni den ta i ligi yeni ki kuni ki ban gubi o bili. Li ya bonli teni ke n lielo mo po li tie maanli ke semeni kuli o li caani o pua po i ligi. Li teni mo ke o pua ki fu ki ta joa. Ya nilo n ta o pua kuli yen kpe.


Jakelini bua ki paadi leni nni


Jakelini n teeni ti ya tuona kuli den piagiti ki pugisi. Ti yaa yen ban tuogi leni JESU yua, li yen pia tipo yibilisi, ke o nan bi yedi ti ke liba kuli kan bi fidi ti. Min den sua ke li pia n po yibilisi yeni, n di guadi ki baa kuagi opo. Sanwunin wani, o den ta jagili ki baa paadi leni nni. Wan kaa den ta jagili ki baa kpa nni yeni den tie bonludikaala. Li ya puoli o den ti yedi o niba n bandi ban baa tieni nni maama. O niba yeni den ban waani n waalo yeni ki yedi :"O bedi pua jakelini yedi ke o bua ŋan lebidi opo a kpelo yeni kelima o fiinti opo a paka boncianla." N waalo yeni den guadi ki yedi ba :"Li ñoagu wan tie yin kpa o. Ba ŋali o kpe mo, n baa ta jagili ki ba yipo ni toa." Bi den guadi ki yedi o ke Jakelini ñabonli ki tie wan kpe, ama ŋan lebidi o leni nitoa.


N waalo bua min kpekelima wan padi ti deeni nni yaaba kuli, n yen teni bi naani n guadi bi gbannandu nni tinga nni. Waa di fu ki padi ti deeni nni nitoa mo. Lanwani, mi niama den ye wan leni Jakelini niba siiga. Lanwani Jakelini niba den yedi ke lan wani ban baa teni min tua gaado ban lu nni tinga nne ban kaa bani nni naan kani. N waalo den yie lani, kelima nilo fu ki ti ban la nni, ke lan wan nan baa bia wan po. Li ya buoli n den suagi liiga yeni, li sua ke o kpekpendiciamo mo den cua ki bua ki la Jakelini. O den tie tuoncagicianli ya liigi yua. Li ya nilo den pia i tisi kuani boncianla ki kpendi ki da i yonbi li biigili diema nni ke bi tuni opo.


Li ya joa, bi bani o ti diema nne boncianla. Ŋali n bi ta o yeli niba boncianla baa bandi o. O pia i kuani bonciala, muuli kuani, jiina kuani, tuuna kuani, kokodi kuaani, soya kuani, ama ya niba n tuuni li kani tie ya niba n kpe tinga nne ke bi piini ba. Li ya niba tie yaaba ke o daaba i daamu nni yaala n tie li biigili diema nni. Li ya nilo kuasi ti kpaandi boncianla a tuoncaga po. Li ya joa den cua ki la Jakelini ki bua ki da yaaba n baa yaa tuuni opo o kuani nni. Li ya daali o den da pita n nibi lole(37). Wan den mua yaala n baa guadi ya yogunu ya ke Jakelini yedi wan ta nni ki gubi. O den ta nni ki cuani nni tinga nne o kuaciamu nni.


I yonbi leni yaaba n kpe ki faadi i kuani nni


Tin den pundi u kuanu nni, li den paki ti leni yaaba n ye li kani n wa maama. Li pakili n den piati ya yogunu i yonbi siiga nni yendo den yedi ti :"Li paki yi leni tin wa maama ka ? Cedi mani waamu ke yi mo baa tua nani tinba." Lan tie waamu, ti den cili ki fandi a fatula. N bua ki waani yi ke yaaba n goandi ti ki tie yaaba n kpe ka, ama bi tie nisaaliba ama bituuni o ñoagu tuonli. Bi mo yen kpendi ki tuuni ki nan guadi ki kuni bi denpo. Li pia bi siiga nni yendo ke ti den la yaba ke laa wagisi, naan kani ya ke o pia li tuonsoandieli. Wan den la nni, o den yasi nni.


Lanwani ti den cili ki tuuni li ya kuanu nni. Li tie ke ya yogunu ke ti baa tundi ki go tugidi ki kpaangu yeni ya ke n sua ke timo baa wadi ki bia nani i yonbi yaaba n sieni. Yua kuli den baa tugi kpangu kuli papala piiga. O yogunu n penda, li ya tugili den ti teni ke ti yabinu wadi. Ti den tuuni leni mi boanma nni paalu. N bua kaaba, tin fuo ya ŋandunli nne li pia yaaba n kpe ke bi piini ba, ama yaaba ke bi suaba kuba yeni kuli den tua yonbi bi tankpiiba diema nni. Bi tua yaaba n gobidi a tuonsoancaga ke bi canbanba fu ki ti taaba ki kuasi tuonsoancaga nni naani n pia i ligi. Niba boncianla yaaba n kpe ke li ŋoadi leni ti suadi kuli bi yen kuasi ba nani i yonbi ki caaniba i kuani nni. Kuani boncianla ye ŋandunli nne ke yaaba n tuni li kani tie yaaba n kpe ki fi kelima li biigili diema nni, i yonbi kuasima pia i ligi boncianla. Li pia i yonbi kuasi kaani boncianla li ŋandunli nni.


Tin den baa cili i soani i kuani nni, ti den sua ke yaaba n tuni li kani kuli den tuuni leni paalu to, kelima yonbo kuli fu ki tugi boti lole, bi bini o bebe. Li kuli den fidi ke li ŋoadi leni yaaba n tuni li kani o ñoagu tuonli. Bi yen tieni i ñakaadi i yonbi yeni paalu n pugini. Ni yendo fu ki tugi papala boncianla ki cuoni cilonbi boncianla li fuali nni ki nan ban pundi naan kani ke a lola sie ki baa tugi lan ya kpaantu. Min den cili li tuonli, n den sua ke ya papala n bi kpiagi npo boncianla yeni kuli den faali, n den fu ki tugi boti lole bi boti ni yenma.


N bua ki waani yi ke i yonbi tuuni leni mi boanma nni paalu ama bi cuon tontoni mo nani li yantiali yaama. Ti bi fu ki cuoni dajena tusa piiga minitinba waamu, ki guadi ki cua. Ti fu ki ñia o kuanu nni ki gedi o dogu nni ki guagi minitinbi lie siiga ki guadi ki cua. Li den pia min baa tugi ki kpaangu yeni boti n yaa da maama yogunu ba tugu nni. Nani min bi pia mi boanma nni paalu yeni, n bi fu ki cuoni kiloonbi boncianla ki gedi ki guadi yogunu waamu tugu nni.


U Tienu n seligi yi





Tweet
Yi pia u sanu ki dadi li ya tila ki boagidi ha.
Ki bak i kuani lanin ya tila, yin ñi naan kani ke li diani PDF yeni.
PDF

Ki bak i yaa cogi a tila, yi baa yaa pia Acrobat Reader.
Hali yi kaa da pia o, yi fu kuani fanma
 :