YUA KPE KI GUA KI FI YA SIEDI N°5


Lanin ya siedi tie o bonmuulo yaala n tie caga luoba yuli nni. Ki bandi mi bangimi ñuadu, gadi ki cili o bonyendo ki ban gbeni o bonluobilo kuli.


Li ya kuani ye ŋali li fuali tugu nni, ŋali ti yen pundi u dogu nni leni a tuga, bi niba yen nua keti tie nani yaaba n tugi ki tie li fuuli. Baa fu ki bandi ke ti tie yaaba n kpe ki nan guadi ki fi, ya tuuni ki tie nani yonbi i kuani nni. Li tie ki tankpiagu leni mi kuanma a lola nni ya puoli ya ke ti koabiga nani yaaba n sieni. Tin yen ye i kuani nni, ti yen nua bi fuagoadiba bi naa fu ki laa ti. Li yen pia yaaba mo n yen kpendi li fuali nni, ki baa tieni i kuani, ama ban kaa nua ti ya kuani yeni, bi yen bisi yogunu ba tinba ya kpaanti ki kaa bani. Bi yen taadi ti kpandi ki bisi boncianla. Li fuali nni pia bonli boncianla, a cicila ko n ye li fuali nni.


Yogunu ba bi badiba yen yie bi fuagoadiba leni bi kpakpaaba po yogunu ba ke ban daa kua li fuali nni kelima a cicila bua ki tieni bonli ba. Baa fu ki waani ba i moamoani kuli. Bi bani i kuani yeni maama li fuali nni leni a cicila leni i yonbi yaaba n tuuni li kani ama baa fu ki waani o dogu nni yaaba. Li den tie kuali bi fuagoadiba n wagisi li fuali nni. Li den pia fuagoadi yendo, yua n yen cuaki tieni ki diagu. O yaa yen tieni ti diadi, ti yen todi o ki teni ti fuayandu n kua ti diadu nni. O den ti ta jagili ki baa kali yogunu waamu li fuali nni. Wan den cua o den cili ki pe i tisi ki kaa bani ke o pe ti kpaandi. O den fiini i yonbi yaaba n kuo yeni ya pala. Bi den ta jagili ki baa kpa o. Yonbi yendo den koani o gbanu nni ki teni ke o kpe. I yonbi yaaba n tuuni i kuani nni yeni yen ku bi niba yaaba n kpendi ki bisi bi po. Li tie yeni ke jayendo yua n den cua ki bua ki ñani tein kpama den kpe. Bi den janiwan den loli ya baabu ki baa do yeni. Li fuali tie ya kaanu ke a cicibiada ye boncianla.


N canba kupiinma


Min den tuuni Jakelini po ya yogunu, n waalo yeni den padi ti deeni nni yaaba boncianla, ama o yaa yen gbaani yua n kuli, n yen guani o naanu. Waa di fu ki gbaani n deeni nni nilo kelima n yen koani ki gaani ki diegu nni yaaba. Ama ban den gedi nni i kuani nni yeni, mii di fu ki koani ki ga ki diegu nni nilo li biigili diema nni. Mi ñima tinga, min ye Jakelini kani n bi pia o paalu, ama min ye i kuani nni, n ko li tie yonbo bebe. Lanwani n waalo den ba leeni ki baa padi li dayeli nni yaaba. Binyenli o den ku li dayeli nni nibiluoba leni n canba mo.


N canba kuuma yogunu, yua n gu i kuani yeni den puni nni sanu ke min gedi ki ban piini n canba. N den gedi leni n gbannandi ki ban sedi n canba kuuma ki nan ta nannantali. Baa den fu ki bandi nni kelima n den yedi ke n tie n canba danli. N den gedi mi kuuma ki yegi leni yonbi bontoaba yaaba n tuuni leni nni u kuanu nni. Ti den gedi ki tie nilanba. Ti den gedi ke ti tie n canba danlinba, ke ti den bisi i ligi boncianla mi kuuma nni. O ba kuli ki den fu ki bandi ti, li tie gadi min ti guadi ki cua tinga nni ya ke n waani li dayeli nni yaaba n canba kuuma n tete maama. Li den pakiba kelima n den waani ba ke n den ye li ya kuuma nni, ki wani ba bonbu kuli n den ŋoaŋoadi maama.


N guadima ki tinga nni


Ti den guadi ki ban suagi ti yema i kuani nni, ama ti den su ke ti liiga yaaba fuo nani yaaba n kaa kpe, n bua ki yedi ke bi fuo nani baa kpe, kelima bi yen cua ki ti soani ki nan guadi li ŋandunli nni. Ama ŋali bi yen bua ki guadi li ŋandunli nni, bi yen jie jiebuolu ba. Mi jietienma nni, bi yen tieni mi jiema caga lie po. Li cagi kpiali tie yaaba n kpe ki tie i yonbi po, li cagi lieli tie yaaba n tie bi nisaaliba ki kpendi ki tuni ki nan gua ki kuni ki tinga nni. Ŋali bi yen bua ki guadi, bi yen jie ban pia ya jiema. Bi den yie tipo ke tin daa jie bi ya jiema. Dayenli, n den ti dini bi jiema, ama bi kuli tie yaaba n tuuni mi boanma nni. Bi den yedi ti ke ŋali ti dini bi ya jiema yeni ti baa kpe. Mi jiema nni, bi yen tieni mi yaama, mani n ba todiba ban ñia li biigili nni. Min den ta jagili ki baa jie ya yogunu, n lieba den yie n po. N den yedi ba :"Li baa ŋani ki kpe ki cie ki yaa tie yonbo ki fuo leni fala."


Li ya niama puoli, bi kuli den tugini n puoli ke ti dini ti liiga yaaba n de di yaala. Mi jiemi yeni n den ba n tugu nni, bonla den tieni. Li den ban tie n po nani min ye mi ñima nni, ke n ti sua ke bonli tudi nni ki ñani nni mi ñima nni. Li den ban tie n po nani n tuba n bi ŋili ki nan ŋiti, nani ti poagidi n bi ye n nuni nni ki nan ñani ki ba. N den la ki yienga leni ki yienga yenyenma bina ta lan ya jiwanciantu leni li ya bigicianli nni. Tin bi tie i yonbi ti bi ye ya yema ke tii fu ki la ki yienga bi o yenyenma. Li kuli den tie bigili nani ban fini ti nunmu. Ti den cili ki gbia i nuani bubula, ki gbia ke o faalu pebisi ti. Ti den ban tiadi tin bi ye li fuali nni ke li tie maama. Yua kuli den tia wan bi tie maama kelima ti yantiana den guadi li kaanu. Min den noandi n ba, n ban nua min bi wa maama li fuali nni, n den yasi. N lieba yua kuli den noandi o lielo n bi wa maama li fuali nni, ti kuli den yasi. Ti jawantu n den coni ti, yua kuli den sani ki cubini o kaanu.


Ti den pia ti yudi leni ti langbiadi boncianla. Noandi mani yua kaa gudi o yudi leni o langbiagu ŋali binata. N den sua ke n gbanu pia ti jagindi boncianla, kelima mii den wuli ŋali binata, ŋali min kpe. Li tie tin den dini li ya jiema ke mi pia mi yaama yeni ke ti den ban ñani li ya fuali nni. N den cili ki nugi yaala n baa ñia li kani kelima li den tie fuabiadili. Min den cuoni danata ki kaa dini ki kaa ñuni, n paalu den gbeni. N den kali tibu tinga ki baa fuodi. N den fu ki gbiadi ke i ŋmaami tieda. Lanwani n den gbadi ŋali foagima ke bi niba kuagi. Bi den tie fuagoadiba. Nani n yuli n bi guubi yeni ke n yudi nan yabi yeni, bi den tama ke li tie fuayanga. Ban den mua yaala n baa pua ya yogunu, n den fi ki sedi. Ban den laa nni, bi den sani ki yieni "cicibiadiga" ki yi JESU yeli.


Ban den tiini ya yogunu n den ŋua ba kelima n bani ke bani n fu ki ñani nni li fuali nni kelima ban wan bani u sanu, min wani ki bani u sanu. Bi den yieni nni :"A tie cicibiadiga, nisaalo kan fidi ki yaa pia yudi manin ye." N den yedi ba"N kpiiba, n den bodi li fuali nni ŋali binata lani n teni ke n tie mani." N den sua ke ŋali n waani ba i moamoani ke n kpe ke bi piini nni ŋali binata, bi baa ŋa nni lanin ya fuacianli nni. Tin den boni leni yua ŋali foagima, bi siiga nni yendo den ti bandi ke n tie nisaalo, ama o lielo wan den gbie leni ti jawantu ki mua ki yiena :"A tie cicibiadiga, nisaalo kan fidi ki yaa tie ŋan tie maama ne." Li juodima bi den ti tuo ki taa nni ki gedi nni bi denpo ke n ban wuli a.


Moala wani, li sieni ban ñani ki kpataboanga min soali yaaga ŋali binata yeni. N buakaaba, i lebimu leni i jugimu kuli ki fu ki jia li ya kpataali. Ti den tieni dana lie ki kaa fidi, ti den gudi ki cedi. Li tie gadi ya yogunu ke n ti jaanti n pali nni :"O Diedo, todi nni min ñani li kpataali" lan ya tie min gbadi ke li kpataali lega. N den yini a fugoada yeni.Bide moani liena waamu tugu nni, ki den fidi ki ñani li kpataali yeni n gbanu nni. Ti den tieni li kpataali yeni o mu nni, o den tieni li kani liena waamu ki kaa dini. Ya kpataali n bi tie n nannanli yeni den ti bodi oba. Li bi tie gadi ti ñani li kpataali yeni, kelima li yaa tie yeni, li biigili diema nni yaaba fu ki ti tieni i ñakaadi ki guani nni. Li ko den tie lani n la n lieba siiga nni nibi ta min leni yaaba n den jiidi li fuali nni yeni. Ban kaa den fudi ki baa ñani a kpataana yeni, bi gobidikaaba den tieni i ñakaadi ke bi guadi.


Lan tieni yogunu waamu, bi fuagoadiba yeni den waani nni o dogu nni sanu. Min den cuoni danata, n den la anteni. N den nua wani ki nan cuoni ki ban la o sanciamu. Li den ban tie n po nani min nua bi niba ke bi naa nua nni yeni. N den la joa ke o yabi. Min den buadi ki wani o n pakili ya yogunu, o den yedi nni :"Daa yagi a yama, n bani a pakili kuli. Ta sanwunin ke a baa ban la mintiena. Ŋan waani ba yaala n tie a pakili, bi baa gedina bi biro kani ki ban yini a po pasiterinba." N buakaaba, li kuli den tieni nani li ya joa n den yedi nni maama. N daani cain ke li ya joa den li tie maleki bi Limiali Diedo wani oba. A mintiena liga yua min den la yua o sanu nni den tie n yado.


Bi den waani o ke Matie Bajoko ye niini. O yedi ke o kpe ki nan guadi ki cua. N yado n den gbadi lani o den tiani ki yedi :"Lanin ya yeli Matie Bajoko tie min buga ke o kpe ke li pundi binata."N yado den yedi ke ban cuani yua yedi ke o tie Matie Bajoko yeniwan biilo nni. Bi den kuani nni n yado biilo nni, wan den la nni o den yasi ki ba ki paba. Bi den gedi no ñoagidieli nni. A minteena den ta nni ki gedini bi patieba kani. Bi den tieni i buali ki baa bandi li yaa tie moani. I buali yeni yuli nni bi den ban bandi ke n ñani o dogu yeni nintualu po. Bi den yini n den yaaba, ki buali ba. Bi den yedi ba ke ban bi pia buga ke bi yi o Matie Bajoko ke o kpe ke li pundi binata.


Yua n kpe ki guadi ki fi ya tila


Li cibali den pundi guveneri, ke o cua ki ti la nni. Bi niba den kpendi boncianla ki bua ki la nni. Guveneri den ta li cibali ki ban waani gufeneri ke bi yedi ban cuo nni ki nan yuandi ki tieni anketi n yuli nni. Bi den yini li ya anketi "yua kpe ki fi tila". N coma puoli bi patieba den yedi ke mi diema kuli niba yama ki sie ke li ŋoadi leni mini. Bi den yedi ke ŋali li cibali yeni tie faama bi baa faligi nni bi niba kuli nintuali. Li ya yogunu sua ke a cicibiada bia ki ŋua nni. N den pia o paalu ki fu ki cie ban coagini nni ya soagili yeni, mii gbia puadu mo kelima n den pia a cicibiada paalu.


N den tiadi min den luo ya yogunu, mintena leni polisinba den cua ki ti pua nni kelima bi de tama ki n tie fadaano. Ama li ya daali n den pua polisinba cagimunli. Lanwani bi den baa waali todikaaba. Li ya puoli bi den loli nni leni i soagili. Li ya daali su ke pasiteri ya den ye likani po banu, ki la ke bi nibaye boncianla polisinbi kani. Polisi den waani o lan tie yaala, ama li ya pasiteri den yedi ke o bua ki la nni ba leni ban yedi o ke n bia maama. Li ya pasiteri den buali nni, ki jaanti n po. O den mia bi patieba ke o bua ki gedi nni jaandieli nni, ama bi den yedi o ke n pia a tila ke gufeneri yedi ban tieni anketi.


N den tieni polisinbi kani ŋmaali luoba ŋali ke gufeneri ti ban ba ya tili n waani ke n kpe leni ya tili n puni sanu ke ban piini nni. Li den kuani ba jiwaanu boncianla, ke bi den bandi moala wani ke n den kpe ki guadi ki fi. Bi den gubi moala yua n kpe binata ki guadi ki cua. Bi yini n na telefoni nni, ki yedi ke wan cua min ye naan kani i anketi yeni po. Bi den buali n na : "Nani Matie Bajoko tie a ya buga ? Ti gubi o kuuma tili leni ya tili n puni sanu ke ban piini o." N na den yedi ke n tie o buga.


Li ya puoli bi den landi nni ki buali n na yaa bani ya boadima n ye n gbanu nni. N na den waani ba boadima kuli leni lan bua ki yedi yaala. Ban den buali n na, li gufeneri den yedi ban sieni n waalo yua n padi nni li padili yeni ki buali o i buali. I buali yeni yogunu n waalo yua n tuuni sutaani po yeni den yedi ke o bani n kuuma po. N kpibuadiba, li tie leni U Tienu ŋanbili ya ke Jakelini ki ku nni kelima o den tie cicibiadiga yua n ya bali n yabi.


N den tiadi mo, min guadi ki cua, bi den baa baatisi nni ama a cicibiada den gubi nni. Li tie gadi U Tienu niba bebe n fu ki yaa gubi nni kelima n den pia a cicibiada paalu. Yogunu ba n den yen baa kua mi baatisima nni ama min den fuo li biigili diema ŋali binta yeni, n bani katoliki jaandieli ŋasiili kuli yaaba n tuuni leni sutaani leni pasiterinba boncianlayaaba n tieni u ñanianu leni sutaani. N den fangi n yuli. N den bua yua n tie U Tienu nilo moamoani yaala n tie n faabima leni n baatisima po. Li den tie moani n faabima ki den te ya bonla n faali ka kelima n waalo yeni yen kpendi leni o kaabo ki jiidi ban gubi nni naan kani ke i pasiterinba nan kpendi ke ti boni yeni ki bua ki cuo nni ki guani nni Jakelini kani, ama laa tuo. Pasiterinba leni mintena tianba den tie siedi leni ya bonla n yen tie li kani ki tie bonlidikaala. Li den tie li biigili leni ti gbannandi koanli.


N canba waalo buga yeni n den jiidi leni o kaabo yeni, o den ñani ki cuoni leni o gbannandi, ki gubi i ligi leni boagili, ki lia tiapiena ki koani bi patieba leni i pasiterinba n den ye naan kani. O den buali ba :"Matie den yaaba baa pani yi be ya leni yin tie ya moandima ? Ga mani lanin ya ligi leni li boagili ki yaa ban tuni yi tuuna ki na teni nni Matie." Li ya yogunu, i pasiterinba den cili ki wangi U Tienu paciamu o kani. Bi den ta JESU ya yeli ki koani leni o. O den bodi bi nintuali. N faabima jaanti yogunu, o den li mua yaala n baa cuo nni, ki guani nni mi ñima tinga ya diema nni min bi ye naan kani.


N waalo yeni tuobu n kaa ta, n pua min ŋa yuan mi ñima diema nni leni a binaada yeni mo den bua ki cuo nni. O gbanu den wudi ke o miasi nni ke min guadi ki cua tin yaa ye. Ban yen jaanti n faabima po ya yogunu, o yen cua ki yaa miasi nni sugili. Pasiterinba yen fu ki gbadi o nialu ama baa fu ki la o. O yen kpendi n kani ñuagu kuli. Yogunu ba mo n yen fundi ki sua ke o dua n kani ki taansoangu. O yaa yen cua ya yogunu kuli, n yen yini pasiterinba ke bi naa fu ki la o ama ki nan gbia o nialu. O yen mua ki gogina ki yieni nni : "Ledi ya ke a baa ŋa nni leni a bila manin ?"N den bani ke li ya pua leni tin ba ya bila tie cicibiada ki bia boncianla.


N batisima leni n faabima


Min den guadi ki cua tinga nne, pasiterinba boncianla yen yieni min tieni mi batisima, ama mii yen tuo li pasiterinba n tieni nni kelima n yen bia ki tiadi min kaa bi kpe ya yogunu n bi tie katoliki. Ama min bi ye mi ñima diema nni, n den bandi li ya jaandieli ŋasiili leni li ŋandunli nne pasiteericiama. N bi laadi pasiterinba leni piretirinba yaaba n kpendi lisiferi n tie ya taana. N bani ke pasiterinba boncianla tie sutaani tuonsoanba. Lanwani n yama ki bi ye pasiterinba n tieni nni baatisima. Ama dayenli ke n gua, n den ba mi doagidima naan kani ke O Diedo yedi ke min tieni mi baatisima, ama mii tuo O Diedo yedima.


Li ya puoli ke pasiterinba jaanti n po, bi moko den ba li ya doagidima. O Diedo den bia ki yieni ke ŋali n kaa tieni mi baatisima, n baa tua muku danata po. Dana waamu min den fi mi guama nni ki taansoangu, n den sua ke mii fu ki kuagi. Li den paki nni. N den cili ki baa kuagi leni bi niba leni n nii. Lanwani i pasiterinba de lingi daali yaali ke n baa tieni mi baatisima. Mi niama den ye i pasiterinba siiga yaala n tie n baatisima po. Bi den bani n maama ke ŋali pasiteri kuli bua ki tieni nni mi baabtisima. Yua kuli bua ki baatisi nni ki baa n niba o kani. Lanwani mi kaadaginma den ye bi siiga.


Li ya puoli li Miali Diedo den ti doagidi ki waani yaala n baa tieni n baatisima daali. O den tuodi ki waani ke n baatisima daali,li biigilinni we biadi ciama baa mua yaala n baa bisi mi baatisima. Lan ya maama doagidima den wudi pasiterinba tianba yaaba n den nia n baatisima yeni po. Yaaba n tuo ki baa tieni nni mi baatisima ba leni ya doagidima n den tieni yeni kuli siiga, n den ñani U Tienu nacemo bonyendo ke wan yaa ye bi siiga. Li ya yogunu n den koabi ke n nuni mo pieni paipai. Mii den pia nunboanma ke n pali mo sie. Yogunu ba n yen gudi n ba kelima mi boanma nni paciami ya yiedi n po. N baatisima daali, bi niba boncanla den cua ki baagu nni kelima n laabaalu den yadi i kaani boncianla diema nni.N den bandi ke mi baatisima pia mayuli o nisaalo miali yema nni, kelima n baatisima pendima ya cicibiada n bi yiedi n po yeni kuli den pendi ki ŋa nni ke n tie ya nilo n faabi cai.


Li ya daali n den ye mi ñima nni leni pasiterinba boncianla. Bi den liini ti pagidi leni i sela ya yani. Ban den seligi ki go pagi li Miali Diedo, U Tienu nacemo den cili mi baatisima tuonli. Wan den cili mi baatisima tuonli ya yogunu, ti den gbadi ke bi niba tiendi ki fuugu. Li den tie weciama lie n den ba mi ñima ni. Ya niba n den cua ki baa le mi baatisima yeni kuli den sani. Ya pasiterinba mo n den ye leni ti mi ñima nni yeni kuli mo den sani ki ŋa min leni U Tienu nacemo min gandi yua n yeni. N den la ke o wua kpialo yeni den kpendi o ganu po. O yen pua mi ñima yeni ki yugi ki guadi ki jiidi. Ki niligu kuli den sie ki nua ŋali foagima ki mua. N den nua li ya wuo n tiedi maama. N den sua ke U Tienu nacemo yeni den ŋuubi o nuni ki kaa bua ki le o wua yeni n tiedi yaala. O den ŋuubi o nuni baya yogunu ke bi niba daa cili ki baa mua mo yeni. Bi niba n den mua yeni n den noandi li ya wuo n den tiedi yaala ki nan bodi mi ñima nni.


N den la o wua lielo. O den nagini ti kani ki fini ki lindi. U Tienu nacemo yeni den bia ki ŋuubi o nuni, o wua yeni den yugidi o yuli mi ñima nni. O den pundi meta mu. Moamoani po, li ya wuo den li tie Jakelini, sutaani ya pua yua n ye a tila nni yeni. Li ya wuo den nua nni ki ti cili ki fiini o pali ki kuagi leni nni. O den yedi nni :"Matie n bua ŋa boncianla, n bi puni a li bonla kuli, nan le ŋan tieni nni yaala. N pali ki mani ŋan soani yaala ne po."O wua yeni n den kuagi leni nni ya yogunu, U Tienu tuonsanlo yeni den gbia ama o den ŋuubi o nuni kaa bua ki le yaala n tiedi. O den kubi i jaandi ki bua ki deli o wua yeni. U Tienu Fuoma Yua n den coni o ya yogunu, o den coni nni ki miani nni mi ñima nni ki guadi ki fiini nni. Li ya puoli Jakelini den bodi.


Ban den tieni li ya anketi ki gbeni, gufeneri den sa npo i moamoani. Bi den tugi nni ki kuani nni o dociamu tugu nni. Bi den buadi min yaa tuuni bipo, ama n bani bi kuli cain ki cili piresidan ŋali bi depitenba. Bi kuli den tieni o ñanianu leni sutaani. Dayenli bi taancianli nni, bi siiga nni liiga yua yendo ki den fidi ki cua tonma, ama wan cua ya yogunu, n den sua ke o tanpolu tie yanga ke o tinga nan tie nilo. O tie lisifgeri yua.


Li ya puoli mi diema pokpialo (li bua ki yedi piresidan pua) den teni bi patieba i ligi ke ban lingi n po ti tiadi. Ti den gedi ki daaga nni ki linga, ti den ban la joa. Li ya joa ki tie nifano, ama yua n kpe ki guadi ki cua. Wan den laati ya yogunu o yama den yagi kelima o bani ke n bani wan tie yua. Wan den la ke n bandi o, o den bodi bi tuonsoanba siiga. Li den tua jiwaanciandi bi tuonsoanba po. Li ya labaalu den yadi i kaani kuli, ama i anketi danba pala ki den mani lipo kelima bi kuli den ye li biigili ya tuona nni.


U Tienu n seligi yi !





Tweet
Yi pia u sanu ki dadi li ya tila ki boagidi ha.
Ki bak i kuani lanin ya tila, yin ñi naan kani ke li diani PDF yeni.
PDF

Ki bak i yaa cogi a tila, yi baa yaa pia Acrobat Reader.
Hali yi kaa da pia o, yi fu kuani fanma
 :