YUA KPE KI GUA KI FI YA SIEDI N°6


Lanin ya bangima tie bangitaankaama yaama ke ti fu ki ba tin cogi ya siedi ne kani, leni o yiinu yaala n tie mi yanlebidima po. O tie o bonluobilo ki go tie o bonjuodi koa yuan kpe ki guadi ki fi yeni ya siedi nni. Yin cogi ki la ya maama li kani tie moamoan pienga. Ya nilo n pia mi yanfuoma ke li dagidi kan di waali siedi bontoa ki ba ki bandi li ya maamamoamoani. Yaaba n kaa dugi li ya maama po ki tie pajuaga danba ki kaa daani, yi fu ki la li ya siedi bonla yaala n tie o kuuma tili, ya tili n puni sanu ke ban piini o, yaala n tie bi patieba n diani ya tili wan guadi ki cua tinga nne leni o yianu, mi kuuma leni mi piinma kuli fotonba. Yi baa laala ke ti tieni la ke li tie nani videwo kaa cie mininbi luoba leni segonninbi ni (6mn8sec) ke li ye mcreveil,org yaala n tie yua n kpe ki guadi ki fi ya siedi n ye naan kani.


Moala wani ke li ya bonla doagidi ke yaala n tieni tie moamoani, ke ti baa fidi ki yaa tiadi lan ya bonla po yogunu kuli, li bua tin ba yanfuoma ki le ya bangima n ye li kani.


TIN BAA BA YA BANGIMA LI KANI


Tin cili li ya cagili leni "ya bangima" ki ŋoadi leni U Tienu tili, ba ke li ya maama kagidi tipo cain kaa di pia niama, yaala n nan pia tinba po mayuli tie tin noandi U Tienu maama nni ki bandi cain ki pugini.Lingi mani ki le U Tienu tili n yedi yaala yaala n tie mi kuuma po, bi tankpiiba diema leni bi tankpiiba fiima po ki le ŋali li ya bonla yaa ye U Tienu maama nni. Li ya bonla baa pia mayuli ki fidi ki bangi ti tin baa mua moala ya muali ti dandanli n ba o paalu.


U Tienu tili, o cilima ŋali o juodima li kuagi tipo ya miali n kan gbeni maama. Tin nua ke bi niba ku maama, ke ti mo nan bani ke daali ye ke ti mo baa ti kpe, li pundi tin buali ti yula ki bandi li ga ledi ya ke U Tienu tili kuagi ya miali n kan gben maama.Ŋali U Tienu kuagi ya miali n kan gbeni maama ke yua kuli nan bani ke o baa kpe, lan bua ki yedi ke ti gbannandu kuumatinga nne tie bonpendikaala ke li puoli mia tali yaye, ke lipo fuoma baa cie tin baa fuo ya fuoma tinga nne. Mi kuuma leni bi tankpiiba fuoma ki di te yefana, ama li ya moamoani n sie ki gu miali fuo kuli.


Yin gubi lanin ya maama ke ya miali n kan gbeni ya guu yi ke yua kuli kan fidi ki cia mo. Ti fuoma tinga nne, miatali ya guu ti. Ŋan tuni U Tienu po, bi ŋan tuni sutaani po, miatali ya guu ti. Ŋan tuo ke JESU tie a Diedo leni a faabikoa, bi ŋan kuasi a miali sutaani po ki tieni u ñanianbiadu leni mi boanma nni ŋandunli leni ya sutantuoncaga n ye nani firanki mason, rose-croix leni ya budiena n ye kuli ki bua ki ba o paalu, li bali, ti kpiagidi, li yeli, leni mi piama tinga nne, bandi ke miatali ya guu ŋa. Lan ya miali, ke wan mani, ke wan kaa mani kuli baa tie ya miali n kan gbeni.


Mi kuuma leni ya miali n kan gbeni maama kuli, ke wan tie bonjengu, bi wan kaa pia gbenma, U Tienu tili bangi ti li ya maama.ŋali li yaa tie yuani n ba li ŋanbili nani 1Tisalonika 4 :3-18, yua kuli baa kpe ki guadi ki fi. Li ya maama tie yaama n diani ke oba kuli kan fidi ki fibidi lan ya maama. U Tienu tili masi Jan tili nni 11 :25-26 :"25 Jesu den yedi o:Mini n tie bi tinkpiba fiima, leni li miali. Yua n daani npo, baa o ya kpe, o baa fo. 26 Yua n fo ki daani nni kan kpe ŋali abada. Naani a dugi mi naa maama po bi?" Li Miali Diedo kadi cain mi kuuma, bi tankpiiba fiima leni ya miali n kan gbeni maama.


Jan 5 :28-29 yedi ti : "Lan da paki yi. U yogunu kpendi ke yaaba n ye a kula nni kuli baa gbadi o nialu, ki ña bi kula nni. Yaaba n den tieni yaala n ŋani baa fii ki ya fo, yaaba n den tieni yaala n bia baa fii ban jia leni ba ti buudi ki cuo ba."Bi tankpiiba fiima ki tie nibi waamu bebe po ka, ama pia miali ki fuo kuli yapo.


Ni tianba baa ba li ŋanbili ki kan bandi mi kuuma, ki baa ñia keli ŋoadi leni bi taa ba leni bi gbannandi nani tin cogi maama 1Tisalonika 4 :13-18 :"Ti kadi ki waani yi line nani o Diedo n den yedi ti yaala: Lani n tie ke tinba yaaba n ye ki fo ŋali o Diedo goacuama, ti kan ga yaaba n den kpe liiga. 16 Mi maalima ya tieni, ke malekinba yudaano kpaani, ke U Tienu kakaci piebi, lanyogunu o Diedo wani oba baa ña ŋali tanpoli po ki jiidi. Yaaba n den kpe leni li dandanli Kilisiti po, baa kpa fii bi tinkpiba siiga. 17 Lani, tinba yaaba n sieni ki fo baa taani leni bani, ki yugi a tawala nni ki tuogi o Diedo mi fawaama nni. Lani ti baa ya ye leni o Diedo ŋali ya yogunu kuli. 18 Lanwani, yin ya baagidi mani yiyaba pala leni laa maama." Ti kan masi li ya maama nieni kelima ti mali ki masi li maama ke li ye mcreveil.org.


Ti baa guadi ki cua tin bi kuagi ya maama nni, ki le kaani waamu naani n masi bi tankpiiba fiima maama. Ti baa la kaani boncianla naani n masi bi tankpiiba fiima maama, ama ki daa teni ti maama n foagidi ki kandi ki ba nunga, ti baa ta kaani ta bebe. Ti baa ta yua n kpe ke baa piini o maama, ti baa ta yua n kpe ke bi piini o ke laa wagisi maama leni yua n kpe ke bi piini o ke li wagisi mo ya maama.


JESU tondiba 9 :36-41"O pua den ye Jope dogu nni ke bi yi o Tabita, yaali n soagini ki yedi Dokasa lan tie o ñoago. O den tiendi a tuonŋama ki puuni a luoda mi todima boncianla. 37 Laa dana nni o den yiagi ki kpe. Bi den wali o ki duoni o li dietuadili nni ki duani o likani. 38 Li sua ke Lida kuu leni Jope. Jesu yaaba yaaba n ye Jope den gbadi ke Pieli ye Lida, ki soani jaba lie ban ban mia o ki yedi: “Jaligi ki cua ti kani.” 39 Pieli den fii ki yegi leni ba. Wan pundi likani bi den ciani o li dietuadili yeni po. A kpepuona kuli den nagini o kani ki buudi, ki waani o Dokasa n den ye leni ba ya yogunu wan den ŋali bipo ya tiayiekaadi leni ya tialakaadi. 40 Pieli den ñani bikuli lienni ki gbaani ki jaandi. Lani o den pegidi ki diidi o kpiemo ki yedi: “Tabita, fii.” O pua yeni den ŋubidi ki laa Pieli ki fii ki kali. 41 Pieli den cuo o nuu ki fiini o ke o sedi. O den yini bi nigagidiŋanba leni a kpepuona, ki taa o ki teni ba ke o fo."


Jan 11:1-45:"Niyendo den ye ki yia ke bi yi o Lasala. O den tie Betani yua. Betani yeni den tie Maliyama leni o naataanpuoga Malata dogu. 2 (Laa Maliyama tie yua n den wuli Jesu taana po tulale ki duuni a leni o yudi.) Lasala yua n den yia den tie o naataanja. 3 A naataanpola yeni den soani u tondu Jesu kani ki yedi o: “Ti Daano, a buado yia.”4 Jesu n den gbadi lani, o den yedi: “Laa yianu kan tua kuuma, u cuo o ke U Tienu n baa ti kpiagidi, ke U Tienu Bijua mo n baa ti kpiagidi kelima u yaapo.”5 Jesu den bua Malata leni o waalo leni Lasala. 6 Wan den gbadi ke Lasala yia, o go den tieni dana lie wan ye naani. 7 Lani n pendi, o den yedi o ŋoadikaaba: “Tin goa ki gedi Jude.” 8 O ŋoadikaaba den yedi o: “Canbaa, laa waagi ke Jufinba den bua ki lugidi a a tana likani, ke a baa goa ki gedi lipoo?” 9 Jesu den goa ki yedi ba: “Yentunmunli kuli pia piiga n leedo lie kaa? Yua n cuoni li yentunli nni kuli kan ya tuudi, kelima o nua ŋanduna ya yenma. 10 Ama yua n cuoni ku ñiagu kuli baa tuudi, kelima mi yenma ki ye o niinni.” 11 Jesu n den maadi lani, o go den yedi ba: “Ti danli Lasala goa, n baa gedi ki ban fundi o.” 12 O ŋoadikaaba den yedi o: “Ti Daano, o ya goa yo wani, laafia baa tieni.” 13 Jesu den maadi o kuuma maama, ama o ŋoadikaaba den tama ke o maadi mi fuodima guama. 14 Lane Jesu den kadi ki waani ba: “Lasala kpe. 15 N pali mani ke mii den ye lipo kelima yi yaapo, ke yin daani nni. Tin fii mani ki gedi opo.” 16 Lanwani Toma, ban go yi yua ku poligu, den yedi o ŋoadikalieba: “Ti mo n gedi mani ki ban taani ki kpe leni o.”17 Jesu den pundi likani ki sua ke Lasala ye li kuli nni ke li pundi dana naa. 18 Li sua ke Betani kuu leni Jelusalema dajenbila taa, 19 ke Jufinba boncianla den cua Malata leni Maliyama kani ki baa baagi ba kelima bi naataanja kuuma po.20 Malata n den gbadi ke Jesu kpendi, o den ñani ki tuogi o, ama Maliyama den ka li dieli nni. 21 Malata den yedi Jesu: “N Daano, a ya den ye ne, n kpelo kan den kpe. 22 Ama n bani ke baa moala ŋan baa mia U Tienu yaala kuli, o ba pa ŋa la.” 23 Jesu den yedi o: “A kpelo baa fii bi tinkpiba siiga.” 24 Malata den goa ki yedi o: “N bani ke o baa fii bi tinkpiba kuli n baa fii ŋanduna juodima daali ya fiima.” 25 Jesu den yedi o: “Mini n tie bi tinkpiba fiima, leni li miali. Yua n daani npo, baa o ya kpe, o baa fo. 26 Yua n fo ki daani nni kan kpe ŋali abada. Naani a dugi mi naa maama po bi?” 27 Malata den yedi o: “Mm, n Daano, n daani ke a tie U Tienu n Gandi Yua, U Tienu Bijua, yua n den baa cua ŋanduna nni.”28 Wan den yedi yeni, o den gedi ki ban yini o waalo Maliyama ŋasiili nni ki yedi o: “Canbaa cua. O yi ŋa.” 29 Maliyama n den gbadi, o den fii tontoni ki gedi Jesu po.30 Li sua ke Jesu daa kua u dogu tugu nni, o da den ye Malata n den tuogi o naankani. 31 Ya Jufinba n den ye leni Maliyama li dieli nni ki baagi o n den laa ke o fii tontoni ki ñani yeni, bi moko den fii ki ŋoadi o kelima bi den tama ke o ca li kuli po ki baa n buudi.32 Maliyama n den pundi Jesu n ye naani ki laa o, o den gbaani o taana kani ki yedi o: “N Daano, a ya den ye ne, n kpelo kan den kpe.” 33 Jesu n den laa o ke o buudi, ke ya Jufinba n yegi leni o moko buudi, li paboanli den cuo o ŋali o pali tugu nni ke o fuo ki jiini. 34 O den buali ba: “Yi piini o le?” Bi den yedi o: “Canbaa, cua ki ban le.”35 Jesu den buudi. 36 Lani yaa po Jufinba den yedi: “Diidi ki le mani wan den bua o maama.” 37 Bi siiga nni bi tianba den yedi: “Wani yua n den puni o juamo ke o nua, naani o kan den fidi ki teni ke one n da kpe?”38 Li paboanli go den cuo Jesu ke o fuo ki jiini. O den pundi li kuli kani. Li kuli yeni den tie tanlongu ke ku tanpabigu bii bu ñoabu. 39 Jesu den yedi: “Biidi mani ku tanpabigu.” Malata yua n kpe naataanpuoga den yedi o: “N Daano, moala o baa nuugi, kelima ŋali ban piini o dinla n tie dana naa.” 40 Jesu den yedi o: “Mii yedi a ke a ya daani ke a baa le U Tienu kpiagidi?” 41 Lane bi den biidi ku tanpabigu. Jesu den yaadi ki nuali tanpoli ki yedi: “N Baa, n tuondi a ke a cengi n maama. 42 N bani ke a cengi n maama yogunu kuli, ama n yedi yeni ya niligu n se ki lindi na ya todima po, ban daani ke fini n soani nni.” 43 Wan den jaandi yeni, o den kpedi o nialu ki kpaani: “Lasala, ña na.” 44 Yua n den kpe yeni den ñani, ke o nii leni o taana kuli finfini a caba, ke li cabili pini o nunga mo. Jesu den yedi: “Findifindi o mani ki cedi wan gedi.”45 Ya Jufinba n den cua Maliyama kani ki laa Jesu n tieni yaala yeni siiga boncianla den tuo ki daani Jesu."


Matie 27 :50-53 : "Jesu go den tiani ke li pa, ki cabi o naano ki kpe.51 Lanyogunu U Tienu dieli nni kpalidoaginkaabu den padi siiga nni, ki cili tanpoli ki ban jiidi ŋali tinga, ki boagidi kaani lie. Ki tinga den digibi, a tana den yagidi, 52 A kula den yaadi, U Tienu nigagidiŋanba yaaba n den kpe siiga, boncianla den fii bi tinkpiba siiga. 53 Bi den ñani a kula nni. Jesu fiima bi tinkpiba siiga puoli, bi den kua u dogagidiko nni ke bi niba boncianla laa ba."


Lanin tie kaani ta U Tienu tili nni yaala n kaa pia niama ke ti kpiilo Matie Bajoko mo ya maama tuugi leni U tienu tili. U Tienu n fiini bi tankpiiba kadi cain U tienu tili nni, ke lan tie yaaba n kpe ke baa piiniba, ke lan tie yaaba n kpe ke bi piiniba ke laa wagisi, bi ki lan tie yaaba n kpe ke bi piiniba ke li wagisi nani ti kpiilo Matie yaama, tin cogi yaama.


Moala, n buakaabatinga li bangima


Li dandanli koanli


Yaaba n jaanti yen jaandi yaaba n kaa pa po leni yaaba n kpe ke bi daa piini ba, leni li kani mo bi yen jaanti leni a pajuaga. Baa bi bani ke bi fu ki jaandi leni dugidu leni bali yaaba n kpe ke bi piiniba fiima po. Ŋali U Tienu teni ke ti gbadi lanin ya maama li tie tin bandi tin pia ya koanli ke li nan bi boani ti. Fundi mani ki cili li koanli. Ki koani ki paadi wan ŋua Li Miali Diedo.


Ti baa koani ŋmaya po ?


Yi baa jaanti yaaba n tie JESU yaaba leni yaaba n kaa jaanti kuli po, yaaba n kpe ke bi dana ki pundi ke li ŋoadi leni bi suaba ya jobidi bi fuoma. Yi fu ki buali ŋali o suano bi sutaani tuonsoanlo fu ki kpa JESU yua; li guanma tie ŋii. Li tie lan ya bonla n tiendi ti siiga daali kuli. Leni ya koanli ke li biigili nni yaaba koani leni ti, JESU yaaba boncianla ku ya koanbiadili n ye tinba leni sutaani ya toagoli siiga naan kani n pia bi suaba, bi budanba leni yaaba n tuuni sutaani po kuli. Bi coali yabi bani yaaba n koani leni ti.


Ti kan li koani ŋmaya po a bada?


Yi kan jaanti bi suaba yaaba ke bi bacieni ñakaadi guadi ki coni ba leni yaaba n tieni u ñanianu leni sutaani ke li guadi ki coni ba. Yi kan jaanti yaaba ke yi waani o laabaaliŋamo ke bi juagi bi pala ba leni U Tienu n puniba ya leeni kuli mo ya po. Yaaba n waali bi bacieni kuuma kelima biadima tienma po bi ki ta jagili sutaani kani yaala n tie ti suadi nni bi ya tuona n bia kuli ya kani, daa bisi mani yi yogunu bipo.


Ti baa koani ledi ya ?


Moala wani ke yi bani ke yaaba ke bi suaba ku yeni kuli ye ti yonbidi nni ki yali nna boncianla, gadi ki ta jagimoanli yaala n tie li koanli nni. Yin jaanti leni paalucianmoanu yin jaanti yaaba yapo ke sutaani tuonsoanba nan gubiba ti yonbidi nni. Yin janti ke JESU ya soama yaama n tie ki jugisiega n loti yin jaanti yaaba yapo ke bi nan gubi ba ke bi tie a kpaada li biigili diema nni.


Yin bisi ban tieni ya ñakaadi ki bua ki yaa gubiba ti yobidi nni ki faabiba leni JESU ya yeli nni ban ñia ki yaa fuo. Koani mani lan ya koanli leni paalu leni ti dugidi. Koani mani lan ya koanli ki daa fuodi ŋali ki ban paadi cain. Sutaani tuonsoanba ki pa nani nin tama maama. Bi pia o paalu gadi JESU yaaba ŋaaba. Li pundi moala ke JESU yaaba n fi ki koani li koanli moamoani. Li tie lan yapo ke ya ke U Tienu ta jagili ki teni ke ti ba lanin ya siedinba.


Bandi mani ki pugini ke sutaani leni o tuonsoanba n gubi yaaba kuli fu ki ba mi faabima. Li na tie gadi ki koani li koanli leni bali, leni yanyenma leni ti dugidi. Yaala n bi poadi ki fidi ki paadi tie ki fidi ki paadi bi niba pajuaga yaaba n kaa bi daani ke nilo fu ki kpe ban piini o lan wagisi wan guadi ki fi. U Tienu waani ti ke li fu ki tieni. Moala wani yaala n sieni ki fidi ki paadi tie li yankuali, leni ti dugidi. Ki nan fidi ki koani leni papaali gadi a tieni a yama nni ke a kpelo, bi a waalo, bi a canba , bi a buga, bi a pua, bi a danli, bi a kpiilo nibi ŋa ban gubi o ke o tie yonbo ki ye leni fala. Yin kan yaa ka ki ŋmini lan ya bonla ya siiga. Fi mani ki koani!


Ŋali U Tienu teni ke a bandi yaaba n gubi a nilo, li tie leni bani ya ke a baa yaa koani. Yin koani leni ba ki yaa tadi bi yela ki bolindi ba. Ban pia paalu maama kuli ŋali a nan puaba yogunu kuli ki kaa fuoda, bi baa ti gbali.ŋali yi kaa bani ba, yi baa suagi liiga leni li koanli ki daa yini yeli ki nan bia ki suagi liiga leni li papaali. Yin daa sundi yaala n ba pua boncianla yua n teni ke yin jaanti yuan po kpe. Daa ŋa mani bi siiga o ba kuli.


O YIINU MI YANLEBIDIMA PO


O yiinu yaaba n kaa jaanti po


Yinba yaaba n cogi lanin ya siedi, bandi mani ke ŋali yi kaa da puni yi miana JESU, yi ye yibilisi nni. Bi suaba fu ki kpaa yi ban bua ya yogunu kuli ki teni yin kpandi yonbo li biigili diema nni ki yaa ye lenifala ki gu ŋali U Tienu n bili yipo ya bina gbenma, ki nan yuandi ki gedi ki fantanbuogu nni o muu n yaa di ŋa ŋali ya yogunu n kaa pia gbenma. Moala ne tie ya yogunu ke yi fu ki tindi, mia mani sugili yi tuonbiadi po ki teni ban baatisi yi yi tuonbiadi po. Yin daa yedi ke yi baa guudi saala kelima yii bani saala n pia yipo yaala. Yin daa yie ki yaa tama ke yi baa ba Matie n baya ŋanbili paabu yeni. Bandi mani ke li ya ŋanbili ki tie bi niba kuli po.


Yinba yaaba n yedi ke yi jaanta, ki naa mali mi lie, lani n bua ki yedi ki mia sugili, ki kua mi baatisima nni, yii nua moala ne te ya yogunu ke yi baa tuo JESU, ki ba mi lebidimoanma keli tuugi leni U Tienu tili n mia yi maama. Daa ti ba mani ki diagu nni ki yaa tama ke n tie katoliki bi evanyeliki. Kilisiti yua tie yua n tuo ki teni o miali yema kuli JESU, ki mia o tuonbiadi sugili, ki kua mi baatisima nni, ki ŋa o tuonbiadi, ki cedi i boandi. Yi bia ki ye sutaani ya kani. Ŋali mi kuuma cua ki laa ŋa ŋan tie maamaa ne, ki fantanbuogu cili a pa. Ŋali yi pia buali yaala n tie mi baatisima po, yin noandi tin tieni ya bangima yaala n tie mi baatisima yapo ke li ye mcreveil.org nni.


Ŋali yi yaa puniyi yule JESU sutaani fu ki baa ŋa. Nani yin cogi maama lanin ya siedi nni, niba boncianlia yaaba tuuni i kuani nni, i bitimu nni leni mu daamu ni tie yaaba n kpe ki guadi ki cua. Yin da yaala mo, boncianla ñia sutaani diema nni, ke ŋali yi dini la mo, yi sani ki ye ti suadi nni. Yaaba n bani JESU wan yen baa jaanti ke o Diedo n pegidi ba ban dii da ya bonla ñani li biigili diema nni.


O yiinu a kpenkpenda leni mi ligi buabiadima danba po


Yinba yaaba n tuo ki baa tieni li bonla kuli i ligi po, ki baa tuo ki kuasi a waalo bi a ciamo, bi a danli ti suadu nni ki bua ki ba i ligi, bandi ke a juodima baa ya bia. Ba ke laa tie sutaani leni yin tieni yaaba ya kani u ñanianu ki bua ki ba i ligi n baa ti cuo yi ŋali bi bandi ke bi ba ki gbeni po ka, ama yii baa cia U Tienu pabienli yi tugutongu po. U Tienu bujiali yipo baa da leni yi tuuona n da maama.


Ya yogunu n tie ne te ya yogunu ke yi baa mia sugili yi tuonbiadi po. Yi fu ki bia ki cia U Tienu pabienli ŋali yi mia sugili yi tuonbiadi po, ki tuo ke JESU n tie yi Diedo leni yi faabikoa. Yin daa ta jagili ki yie. Yin daa yedi ke yi ba cedi saala mo, kelima sutaani nua yi.O coadi yi dana. Ŋali a tudi ya yogunu, o baa kpa yi. Yini JESU wan kua a pali nni ki yaa gu ŋa.


O yiinu yaaba n bua ki tua piada, ki tua niciama ki yaa pia paalu yapo


Yinba yaaba n bua ki ba mi piama, ki yaa pia o paalu ki tie niciama li ŋandunli nni, ki ba lan ya bonla gadi ki tieni o ñanianu leni sutaani ki nan baa la. Ŋanduna nne bali leni mi kpiagidi tie sutaani yaama ke o puuni wan bua yua nani tin fu ki cogi li ya maama Luka 4 :5-7: "Sutaani den gedini o ya kaanu n kpedi ki teni ke o laa ŋanduna diema kuli yenma, 6 ki yedi o: “N baa pa ŋa laa bali kuli leni laa diema leni mi kpiagidi, kelima bi puni nni likuli, n mo baa pa la min bua yua kuli. 7 Lanwani a ya gbaani n nintuali, likuli baa tua a yaala."


Yii fu ki ba li bali, ti kpiagidi, u paalu ŋandunli nne ki kaa tagini sutaani ya kani, ki teni o a naanu ki baa ti ban yaa ye ki fantanbuogu nni ŋali ya miali n kan gbeni. Ki yaa tiini ki ŋua ŋanduna nne bonfanla, bandi ke li tie a miali ya dunga leni ya miali n kan gbeni yapo ke sutaani baa pa yi yin mia o yaala kuli. O kan pa yi bonla fanma po ka. Yin tiendi ya ñanianu leni o yeni, yi kaa ti suni ke yi bi tieni la. Ki fantanbuogu ya guu yi ya yogunu n kaa pia gbenma po. Lanin ya yogunu tie yuun ke yi baa tuo JESU Kilisiti ki ba ki yaa ye leni o ya miali n kan gbeni o diema nni.


O yiinu bi yanyanba leni o gbansiaginu danba ya po


Yinba yaaba n tiendi u ñanianu leni lisiferi ki bua li yeli, ki ba ti kpiagidi i ligi leni li faadi kuli lanin ya ŋandunli nni, bandi ke yin tieni ya ñanianu yeni baa fa ki ba yi yula po. Li tie o yogunu bebe n poadi. Sutaani baa cuo yi ki sieni li ya ñanianu ki teni yin yaa ban tie yonbo ki gu yi dana n baa gbeni yin nan gedi ki fantanbuogu nni ya miali n kan gben po. Yi pia a nannana yi lieba yaaba n kpe ki ban tie yonbi sutaani diema nni. Yi baa yedi ke yinba wani kan tieni ban tieni yaala ke sutaani kuuba yeni. Yi boandi yi yula. Sutaani ya kani yi ko li baa tiendi mi tudima. O baniwan baa dia ki diagu maama, o baniwan baa tieni maama ki baa ŋa. Ŋali yi yieda, ya yogunu n ŋua po yi baa ti faa ki laa la. Yin ga lanin ya maama ke sutaani ki puuni bonla fanma po ye. Leni yi miali ya ke yi baa pa yin ga o kani yaala kuli. Cuo mani U Tienu n puni yi ya yogunu ne ki sani lisiferi diema, ki faabi yi naani ki lingi o boali kaanu JESU kani.


O yiinu bi suaba leni sutaani niba yaaba n sieni ya po.


Yinba yaaba n ye ti suadi nni, i bulisi nni, sutaani ñaniani nni leni sutaani tuona buolu nni nani firanki mason, rose-croix kuli, yinba yaaba n yen ye ki ñuagu a kakura nni leni a taanbiada nni sutaani diema nni, bandi mani ke yi juodima baa ya bia. Lisiferi yin tuuni yuan ya po bani ke o kaanu tie ki fantanbuogu o yogunu kuli po. Li tie diagu ya ke o tandi yipo ki bua yi mon faligi nani wani ki fantanbuogu nni. Daa ba mani o diagu nni. Daa daani mani o faama po.


Yi fu ki buali yi yula ŋali o yogunu yaa pendi yipo, bi ŋali yi yaa di fu ki ba ki faabi leni yin tieni ya tuginma leni sutaani yeni, ki ba sugili yin tieni ya tuongunda kuli yapo.Mi maama guanma tie ŋii. JESU Kilisiti bua ki pani yi sugili yin tieni yaala kuli po ba lan da maama. Teni o yi miana moala nne ki lingi o boalikaanu wan ya kani. Ŋali yi bua ki mia JESU wan tua a faabikoa leni a Diedo ki yaa tie a canba paano, gbaani ki mia o moamoani a pali nni. O baa tuo yi kiciani yi yaala n tie yi faabima cain ya sanu nni.


U Tienu n seligi yi





Tweet
Yi pia u sanu ki dadi li ya tila ki boagidi ha.
Ki bak i kuani lanin ya tila, yin ñi naan kani ke li diani PDF yeni.
PDF

Ki bak i yaa cogi a tila, yi baa yaa pia Acrobat Reader.
Hali yi kaa da pia o, yi fu kuani fanma
 :